Зеректік

Екі жолаушының алдынан бір адам шығады. Ол: – Менің түйем жоқ. Сендер оны көрдіңдер ме? – дейді. Бірінші жолаушы: – Түйенің оң көзі көрмей ме? – деп сұрайды. – Иә, – деді адам. Екінші жолаушы: – Түйенің сол жақ артқы аяғы дұрыс жүрмей ме? – деп сұрайды. – Иә, дұрыс жүрмейді, – дейді адам. Бірінші жолаушы: – Түйенің құйрығы қысқа ма? – деп сұрайды. – Иә, құйрығы қысқа, – дейді адам. – Сендер түйені қайдан көрдіңдер? – деп сұрайды адам. – Біз түйені көрген жоқпыз, – дейді жолаушылар. – Көрмесеңдер, түйенің белгілерін қалай білдіңдер? Сендер менің түйемді ұрладыңдар ма? – дейді адам. – Жоқ, біз түйені ұрламадық. Біз мал бақтық. Біз малды жақсы білеміз, – дейді жолаушылар. Үшеуі биге келеді. – Сендер түйені көрмедіңдер. Бірақ түйе туралы көп нәрсе білесіңдер. Қалай білдіңдер? – деп сұрайды би. Жолаушылар: – Біз түйені көрмедік. Бірақ оның ізін көрдік. – Түйенің оң көзі туралы қалай білдіңдер? – деп сұрайды би. – Түйе жолдың сол жағындағы шөпті жеді. Оң жағындағы шөпті жеген жоқ. Сондықтан оның оң көзі көрмейді деп ойладық. – Ал аяғы туралы қалай білдіңдер? – Түйе шөп жеген кезде сол жақ артқы аяғын көтеріп тұрды. Сондықтан оның аяғы дұрыс жүрмейді деп білдік. – Ал оның қысқа құйрығы туралы қалай білдіңдер? – Түйенің құйрығы қысқа, себебі оның құмалағы алыс жерге түсті. Құйрығы ұзын түйе құмалағын алысқа тастамайды.

А.Байтұрсынұлы. Алты томдық шығармалар жинағы. ІІ том.