Аудио плеер
0:00
--:--
Қазақша мәтін
Екі балаға жаңа жылдық сыйлық алу керек. Гүлнәрдің жақында дәрігерге қаралуы бар, жүктілігі қалыпты екеніне көз жеткізу қажет. Тоңазытқыш сынып қалды. Не жөндеу керек, не жаңасына тапсырыс беру керек. Жұмыстағы Жаңа жылдық кешке бару-бармауды бүгін шешу қажет...
Асқар өзін осы екі сөз – керек пен қажеттің ортасында қалғандай сезініп келеді. Жасы отыздан асты, бір қызы, бір ұлы бар, әйелі жүкті. Жақсы бір компанияда жұмыс істейді, жалақысы да жаман емес. Десе де бірде анаған, бірде мынаған жетпей қалады. Ата-анасына көмек беру, қарындасына ақша салу, достарымен қала сыртында кәуап пісіру, екі жылда бір рет Түркияға демалысқа бару...
Асқар Алматыға осыдан он жыл бұрын келген. Университетке түсу үшін емес, жұмыс үшін. Сол беті жоғары білім алмады, бірақ түрлі жерде жұмыс істеп, соңында жақсы бір деңгейге жетті. Шүкір. Қарындасы Кәусар биыл грантқа түсті. Асқар оны Шымкенттен өз көлігімен Алматыға жеткізіп, маңдайынан сүйіп, керек-жарағын алып беріп, жатақханада қалдырды.
– Үйге келмедің бе. Айттым ғой саған, үй кең, бәріміз бірге тұра берейік дедім ғой, Кәусар.
– Түу, аға, – деді телефон соққан қарындасы. – Мен басқа нәрсе айтып тұрмын ғой. Жатақханада тұрсам да, сіздермен бірге тұрсам да ол жігіт менің соңымнан қалмайды. Сіз сөйлесіңізші.
Көлікті біреу айналып өтпек болды. Асқар дыбыстық сигналды басып, жол бермеді: айналма жол емес, штраф алуға болады. Сағат кешкі сегіз болса да, кейбір жолдарда әлі кептеліс бар.
– Алтыным, кейін хабарлассам бола ма? Өзің білесің, жолдамын, мына кептеліс бітпей қойды. Сосын жайлап айтып берерсің. Ол жігіт кім, неге сені айналсоқтап жүр, біз не істей аламыз... Кешке сөйлесейік. Сағат он бірлерге таман.
Кәусардың дауысы кенеттен тыныш бола қалды. Жылап тұрған сияқты. Асқар бұған аса мән бермеді: ойында ертеңгі дәрігерге қаралу, екі баласы, алдағы жол, қоймай айналып өтуге тырысып жатқан мына бір қырсық көлік...
– Кешке хабарласам, – деп, Кәусар телефонды қоя салды.
Сағат он бірде Асқар балаларын төсекке жатқызып, әйелінің дәрі-дәрмегін, түнде тұрып ішетін суын жанына қойды да, телефонына үңілді.
Кәусар сол беті хабарласпады. Асқар түнгі сағат екіге дейін күтті. Сосын бетін бір сипады да, жантайып, ұйқыға кетті.