Audio player
0:00
--:--
Kazakh Text
Әкесі он жасар баласымен далада келе жатады. Жолда ол баласынан сұрайды:
– Анау өрмекшіні көрдің бе? Ол не істеп жүр?
– Көрдім. Өрмек тоқып жүр.
– Ал құмырсқаны көрдің бе?
– Көрдім. Аузында нанның кішкентай қиқымы бар. Бір жаққа жүгіріп барады.
– Жоғары қарашы. Аспанда не көрінеді?
– Қарлығаш ұшып жүр. Тұмсығына шөп тістеп алған.
Сонда әкесі:
– Шырағым, осы кішкентай тіршілік иелерінен үлгі ал. Өрмекші маса мен шыбын ұстау үшін тұзақ құрып жүр. Ұстаған жәндіктерін азық етеді. Құмырсқа да бала-шағасына тамақ іздеп жүр. Нанның қиқымын өзі жемей, үйіне алып барады. Қарлығаш балапандарына ұя жасау үшін шөп жинап жүр. Көрдің бе, бәрі еңбек етіп жүр. Ешқайсысы бос жүрген жоқ. Құдай сені де бос жүру үшін жаратқан жоқ. Сен де жұмыс істеуге әдеттенуің керек, – дейді.
Сөздік:
өрмекші - spider
өрмек тоқу - to spin a web
құмырсқа - ant
қарлығаш - swallow
үлгі алу - to learn from someone's example
тұзақ құру - to set a trap
азық ету - to use as food
әдеттену - to get into the habit
Source
Ыбырай Алтынсарин. «Өрмекші, құмырсқа, қарлығаш». Wikisource, электрондық мәтін.