Audio player
0:00
--:--
Kazakh Text
Қазақстан – табиғаты өте алуан түрлі ел. Оның аумағы үлкен болғандықтан, мұнда кең дала, биік таулар, терең көлдер, ормандар мен шөлейт жерлер кездеседі. Қазақстанда төрт мезгіл де анық байқалады: көктем, жаз, күз және қыс. Әр мезгілдің өзіне тән табиғаты мен ерекшелігі бар.
Көктем – табиғаттың оянатын кезі
Көктем келгенде Қазақстанның табиғаты өзгере бастайды. Қар еріп, күн жылынады. Далада алғашқы гүлдер өсіп, ағаштар бүршік жарады. Құстар жылы жақтан қайта оралады. Көктемде даланың түсі де өзгереді. Қыс бойы сұр болып жатқан жер біртіндеп жасыл түске боялады. Адамдар да жылы күндерді асыға күтеді. Наурыз мерекесі көктемнің келуімен байланысты. Бұл кезде адамдар бір-біріне жақсы тілектер айтып, ұлттық тағамдар дайындайды.
Жаз – саяхат пен демалыс маусымы
Қазақстанда жаз кей жерлерде өте ыстық болады. Оңтүстік өңірлерде ауа температурасы жоғары болса, таулы аймақтарда ауа салқындау келеді.
Жазда адамдар табиғатқа шығуды жақсы көреді. Біреулер тауға барады, енді біреулер көл жағасында демалады. Алматы маңындағы таулар, Бурабайдың табиғаты, Алакөл мен Балқаш көлдері жазда туристерді көп қызықтырады.
Қазақстанның кең даласын жазда көру ерекше әсер қалдырады. Көк аспан, жасыл шөп және алыста созылып жатқан кең дала елдің ерекше көрінісін көрсетеді.
Жаздың үш айында, яғни маусым мен тамыз айларында оқушылар мен студенттер жазғы демалысқа шығады.
Күз – алтын түсті мезгіл
Күз келгенде ауа біртіндеп салқындайды. Ағаштардың жапырақтары сары, қызыл және қоңыр түске өзгереді. Сондықтан күзді кейде «алтын мезгіл» деп атайды.
Күз – табиғаттың тынышталатын кезі. Егін жиналып, адамдар қысқа дайындала бастайды. Қалаларда да күздің әсері байқалады: күн қысқарады, ауа салқындайды, адамдар жылы киімдерін киеді.
Таулы жерлерде күздің көрінісі ерекше әдемі болады. Жасыл ормандардың түсі өзгеріп, таулардың айналасы түрлі түске боялады.
Қыс – ақ қарлы Қазақстан
Қазақстанның қысы кей өңірлерде өте суық болады. Солтүстік және орталық аймақтарда қар қалың түсіп, температура қатты төмендеуі мүмкін. Ал оңтүстік өңірлерде қыс салыстырмалы түрде жылырақ. Қыста Қазақстанның қалалары мен даласы ақ қарға оранады. Адамдар шаңғы тебеді, коньки тебеді немесе тауға демалуға барады. Алматы маңындағы Шымбұлақ сияқты тау курорттары қысқы демалыс үшін танымал. Қыс шетелдіктер үшін ерекше әсерлі болуы мүмкін. Әсіресе жылы елдерден келген адам Қазақстандағы аяз бен қарлы даланы көріп, таңғалуы мүмкін.
Төрт мезгілде төрт түрлі Қазақстанның табиғатын бір сөзбен сипаттау қиын. Көктемде – табиғат оянады, жазда – дала мен таулар жанданады, күзде – айнала алтын түске боялады, ал қыста – жер ақ қарға оранады. Төрт мезгіл Қазақстанды төрт түрлі қырынан көрсетеді. Сондықтан бұл елге жылдың әр уақытында келген турист жаңа көрініс пен жаңа әсер таба алады. Қазақстанды бір рет көру – бір әсер, ал төрт мезгілде көру – төрт түрлі Қазақстанды көру.
Авторы: Гүлжиһан Көбденова