Audio player
0:00
--:--
Kazakh Text
Бір күні Тобықтының бірнеше беделді адамы Абайдың үйіне жиналады. Олар әңгімелесіп отырады. Сол кезде Қиясбай үйге кіріп келеді. Бірақ адамдар оған назар аудармайды.
Қиясбай біраз уақыт үнсіз тұрады да, дауыстап:
– Абай ағаммен жеке сөйлесуім керек. Бәріңіз сыртқа шыға тұрыңыздар!-дейді.
Үйдегі адамдар оның сөзіне таңқалады. Олар бір-біріне қарап, кейін Абайға қарайды.
Абай:
– Қиясбайдың менімен жеке сөйлесетін шаруасы болса, сыртқа шыға тұрыңыздар,-дейді.
Адамдар амалсыздан сыртқа шығады.
Абай Қиясбай екеуі қалған кезде:
– Не болды, Қиясжан?-деп сұрайды.
Қиясбай:
– Абай аға, маған ренжімеңіз. Жаңағы адамдар мені адам сияқты сыйламады. Мен оларға күшімді көрсеткім келді. Сондықтан әдейі солай айттым, -дейді.
Абай оның сөзіне қатты күледі.
– Қияс, тапқырлығың маған ұнады. Саған қой берейін. Алып кете аласың ба? – дейді.
Қиясбай күлімсіреп:
– Алып кетемін. Сіз бір емес, бірнеше қой бересіз,-дейді.
Абай қатты күледі.
Содан кейін Қиясбайға бір емес, он шақты қой береді.
Source
Бабалар сөзі: Жүзтомдық. – Астана: «Фолиант», 2013. Т. 96: Ауызекі әңгімелер. – 432 б.